FILOSOFÍA 4º ESO-LOMCE
OBXECTIVOS
Esta materia serve de introdución fundamental á
materia obrigatoria e común de Filosofía de 1º de Bacharelato e ás materias optativas de 1º de Bacharelato e
de 2º de Bacharelato seguintes: Antropoloxía
e Psicoloxía, e Historia da
Filosofía, Ética e Filosofía do Dereito e Filosofía da Ciencia
e da Tecnoloxía, respectivamente.
A Filosofía de 4º da ESO, optativa de 3 horas
lectivas, ten como unha das súas finalidades a de contribuír e dotar ao
alumnado dunha capacidade básica de
comprensión, que enraíza nas súa propia experiencia humana, vivencias,
inquedanzas e interrogantes. Potencia e activa as capacidades crítica, de argumentación e de síntese,
imprescindibles para o seu desenvolvemento como persoa e como cidadán, todo
isto desde a plataforma do pensamento filosófico. Por conseguinte, non se trata
de un mero aparato teórico de contidos senón de proporcionar instrumentos para
a dimensión práctica e o
fortalecemento da autonomía persoal,
o respecto e a tolerancia.
CONTIDOS
A materia estrutúrase en seis bloques temáticos que
recollen aspectos teóricos e prácticos, sempre desde unha flexibilidade
coherente. Interesa máis a calidade dos temas presentados que a cantidade. Non estamos a bater récords senón a
aprender desfrutando.
-Bloque 1: A
Filosofía: que é?, para que serve?
-Bloque 2: Identidade
persoal (introdución á Psicoloxía): quen
son eu?, como me comporto?, por que?, que significa o que soño?
-Bloque 3: Socialización:
eu estou so no mundo ou estou con outros?
-Bloque 4: Pensamento:
por que se di que son un animal racional?
-Bloque 5: Realidade:
hai un mundo aí fóra?, que hai despois
desta vida?
-Bloque 6: Transformación:
eu son libre?, que podo aportar?
Artes
Escénicas e Danza 4º ESO
Esta asignatura de Artes Escénicas e Danza pretende
dotar o alumno dos coñecementos, técnicas e procedementos que lle permitan
expresarse artisticamente a través das linguaxes do Teatro e a Danza.
Os alumnos e as alumnas deben comprender as
diferentes linguaxes escénicas, así como o devir da historia do teatro e a
danza ao longo dos séculos.
Trátase dunha materia fundamentalmente práctica. É indispensable que o alumnado tome conciencia dos seus recursos expresivos, e os desenvolva co seu propio corpo, atendendo a súa capacidade de concentración, relaxación e equilibrio psicofísico, como unha maneira de mellorar as súas habilidades comunicativas, capacidade dramática, recursos no terreo da oralidade e o desenvolvemento da sensibilidade rítmica e melódica a nivel corporal e vocal
CIENCIAS APLICADAS Á
ACTIVIDADE PROFESIONAL. 4º ESO
Introdución
O coñecemento científico permítelles ás
persoas comprenderen e valoraren a súa realidade e a do seu contorno. Para
chegar a este nivel de comprensión cómpre coñecer e aplicar os métodos da
ciencia para identificar os problemas nos diversos campos do coñecemento e da
experiencia, e valorar criticamente os hábitos sociais en distintos ámbitos.
Como un saber integrado que é, o coñecemento
científico estrutúrase en distintas disciplinas e, neste contexto, a materia
de Ciencias Aplicadas á Actividade Profesional ten como obxectivo ofrecerlle ao
alumnado a oportunidade de aplicar en cuestións prácticas, cotiás e próximas os
coñecementos adquiridos ao longo dos cursos anteriores en disciplinas como
Química, Bioloxía ou Xeoloxía.
É importante que, ao finalizar ESO, o alumnado teña
adquiridos coñecementos procedementais na área científica, sobre todo en
técnicas experimentais. Esta materia vaille
achegar unha formación experimental básica e vai contribuír á adquisición dunha
disciplina de traballo no laboratorio, respectando as normas de seguridade e
hixiene, e valorando a importancia de utilizar os equipamentos de protección
persoal necesarios en cada caso. Asemade, esta materia proporciona unha orientación xeral aos/ás
estudantes sobre os métodos prácticos da ciencia, as súas aplicacións á
actividade profesional, os impactos ambientais que leva consigo, así como
operacións básicas de laboratorio relacionadas. Esta formación achegaralles
unha base moi importante para aborda-ren en mellores condicións os estudos de formación
profesional nas familias profesionais Agraria, de Industrias
Alimentarias, de Química, de Sanidade, de Vidro e Cerámica, etc.
Os contidos preséntanse en catro bloques. O bloque 1 está dedicado ao traballo no laboratorio; é importante que os/as
estudantes coñezan a organización dun laboratorio, os materiais e as
substancias que van usar durante as prácticas, facendo moito fincapé no
coñecemento e no cumprimento das normas de seguridade e hixiene, así como na
correcta utilización de materiais e substancias. É importante que manipulen e
utilicen os materiais e reactivos con total seguridade. O obxectivo é que o
alumnado realice ensaios de laboratorio que lle permitan coñecer as técnicas
instrumentais básicas.
Procurarase que os/as estudantes poidan obter
no laboratorio substancias con interese industrial, de xeito que establezan
unha relación entre a necesidade de investigar no laboratorio e a posterior
aplicación dos resultados á industria. Logo de finalizado o proceso anterior, é
interesante que coñezan o impacto ambiental que provoca a industria durante a
obtención dos referidos produtos, valorando as achegas que á súa vez fai a
ciencia para mitigar o impacto e incorporando ferramentas de prevención e
corrección que fundamenten un uso e unha xestión sustentables dos recursos.
O bloque 2 dedícase á ciencia e á
súa relación co ambiente. A súa finalidade é que os/as estudantes coñezan os
tipos de contaminantes, as súas orixes e os seus efectos, así como o tratamento
para reducir os seus impactos e eliminar os residuos xerados. A parte teórica
debe ir combinada coa realización de prácticas de laboratorio que lle permitan
ao alumnado coñecer como se poden tratar estes contaminantes e como utilizar as
técnicas aprendidas. O uso das tecnoloxías da información e da comunicación
neste bloque está especialmente recomendado para realizar actividades de indagación
e de procura de solucións ao problema ambiental, do mesmo xeito que o traballo
en grupo e a exposición e defensa das conclusións das investigacións por parte
dos/das estudantes.
O bloque 3 é o que máis novidades
achega para os/as estudantes e debería traballarse combinando os aspectos
teóricos cos de indagación, utilizando as tecnoloxías
da información e da comunicación, que constituirán unha ferramenta moi útil
para que o alumnado poida coñecer os últimos avances neste campo a nivel
mundial e local.
O bloque 4 ten como obxectivo a realización de proxectos de
investigación en grupo seguindo os métodos da ciencia aplicados a coñecementos
adquiridos en cursos anteriores. Os/as estudantes deberán apoiarse nas
tecnoloxías da información e da comunicación para a elaboración e a
presentación das súas investigacións, e ao mesmo tempo coidarán a expresión
oral e escrita nas conclusións finais dos seus proxectos.
Os/as
estudantes deben estar perfectamente informados/as acerca das posibilidades que
se lles poden abrir nun futuro próximo e, do mesmo xeito, deben posuír unhas
ferramentas procedementais, actitudinais e cognitivas que lles permitan
emprender con éxito as rutas profesionais que se lles ofrezan.
BLOQUE 1
1.1. Organización do laboratorio: materiais e normas de seguridade e
hixiene.
1.2. Aplicación do método científico aos traballos de laboratorio.
1.3. Utilización de ferramentas das tecnoloxías da información e da
comunicación para o traballo experimental do laboratorio.
1.4. Técnicas de experimentación en física, química, bioloxía e xeoloxía.
1.5.Técnicas e procedementos de
desinfección de materiais en distintos sectores.
1.6. Análise da aplicación da ciencia en campos profesionais directamente
relacionadas con Galicia.
BLOQUE 2
2.1. Contaminación: concepto e tipos.
2.2. Contaminación atmosférica: orixe, tipos e efectos.
2.3. Contaminación do solo.
2.4. Contaminación da auga.
2.5. Calidade da auga: técnicas de tratamento e depuración.
2.6. Contaminación nuclear.
2.7. Análise sobre o uso da enerxía nuclear.
2.8. Xestión dos residuos.
2.9. Normas básicas e experimentais sobre química ambiental.
2.10. Xestión do planeta e desenvolvemento sustentable.
2.11. Importancia das campañas de sensibilización sobre o ambiente.
Aplicación no contorno máis próximo.
BLOQUE 3
3.1. Concepto de investigación, desenvolvemento e innovación, e etapas do
ciclo I+D+i.
3.2. Tipos de innovación. Importancia para a sociedade.
3.3. Papel das administracións e dos organismos estatais e autonómicos no
fomento da I+D+i.
3.4. Principias liñas de I+D+i actuais para o sector industrial.
3.5. Utilización de ferramentas das tecnoloxías da información e da comunicación
no ciclo de investigación e desenvolvemento.
BLOQUE 4
4.1. Método científico. Elaboración de hipóteses, e a súa comprobación e
argumentación a partir da experimentación ou a observación.
4.2. Artigo científico. Fontes de divulgación científica.
4.3. Proxecto de investigación: organización. Participación e colaboración
respectuosa no traballo individual e en equipo. Presentación de conclusións.